චින්තනය නිදහස් වේවා ! දේශපාලනික ලිපියක් නොවේ

සෘජු මාවතක ගමන් කිරීමට අපට මඟ පෙන්වනු මැනව.

ශුද්ධ වූ කුරානය .

ඓහලෞකික කරුණු මා විසින් කියන ලද නම්, ඔබ විශ්වාස නොකරන්නෙහිය. මා ද්‍රව්‍යමය කරුණු ගැන කියන කල්හි ඔබ එය කෙසේ විශ්වාස කරන්නෙහිද ?

ශුභාරංචිය : ශාන්ත ජෝන් (111-112)

අසාරේ සාරමතිනො
සාරෙ චා'සාරධස්සිනො...
යම් කෙනෙක් කිසි හරයක් නැති අදහස් වල හරයක් ඇතැයි සිතත්ද,සාරවත් ධර්මයන් නිසරු කොට සලකත්ද වැරදි අදහස් වලට ගොදුරු වූ ඔවුහු මාර්ගඵල ආදී සාරයක් නොලබත්.

ධම්මපදය : යමක වග්ගය.

ඉහළ උපුටලා දක්වලා තියෙන කරුණු වලටම අදාලා වෙන පහළින් මම කියන්න යන කතාව අහලා නැති කෙනෙක් ඉන්නවා නම් ඒ සුළුතරයක්ම තමයි.ඒත් ගැටලුව තියෙන්නෙ මේ කථාවෙන් කියන්න යන දේ අපේ හිත් වලට කොයිතරම් එක් කරගෙන අපි ජීවිතය අත්දකිනවද කියනඑකයි....

අනිත් අය කියන කරන දේවල් පැත්තකින් තියමු.එහෙම නැත්නම් මේක මහ කුහක කතාවක් වෙනවනෙ. මම උණත් මේ කියන කතාව තුළින් කියවෙන හර පද්ධතිය තාමත් ජීවිතේට ගොඩක්ම ළඟා කරගෙන නෑ කියලා හිතෙන්නෙ මගේ ක්‍රියාකලාපය මමම විවේචනය කරමින් බලන වෙලාවටයි.

ඒ තමයි කාලාම සූත්‍රය..

ආ ඒකද ඒක අපි ඕනි තරම් බණට අහලා තියෙනවා..පහුගිය කාල වලදි ඕනි තරම් තොරන් වල පහන් කූඩු වල තේමාව වෙලා දැකලා තියෙනවා කියලා මුලින්ම හිතට එන එක අරුමයක් වෙන්නෙ නෑ..

එහෙම උණත් අපි තැනින් තැන දකින තර්ක විතර්ක, කතා බහ, අඬා දොඩා ගැනීම්, වැලපිලි සියල්ලම දකින කොට හිතෙන්නෙ මේකෙන් කියවෙන ස්වාධීන චින්තනය මොකද්ද කියලා කවුරුවත් හරියට අරගෙන නැහැයි කියලයි..මේ කතාව ඇදුණෙ අපි යාළුවො කට්ටියක් එක්ක ඉන්න වෙලාවක එකෙක්

"මචන්ලා මූණු පොතේ අරූ මේක ගැන මෙහෙමයි කියන්නෙ ..මම අහලා ඉගෙන ගෙන තියෙන්නෙ මෙහෙමයි..හරි මොකද්ද ?"

"මචන් දැක්කද අරූගෙ බ්ලොග් එකේ ලියලා තිබ්බ ලිපියට අරූ ලියලා තිබ්බ කමෙන්ට් එක ? ඒකට එකෙකුටවත් කට උත්තර නැතුව කුජීතවෙලා තිබ්බා. අපිට් ඉගෙන ගෙන තිබ්බෙ අරූ කිව්ව විදියට උණාට අර කමෙන්ට් එක කියෙව්වහම මටත් හිතුණා ඒක ඇත්ත කියලා"

"මොකද්ද බන් ඔයිකෙන් හරි ?"

"උඹ නම් අර කතාව හරියටම දන්නවා ඇතිනෙ..අරූ  උඹේ යාළුවනෙ ඒක ඇත්තද බන් ?"

ඔහොම්මම අර කොසොල් රටේ කාලාම ගොත්‍රයේ කට්ටිය වාසය කරපු කේසපුත්ත ගමේ අයත් බුදුන් ඒ ගමට චාරිකාවේ  වැඩියහම ඇහුවලුනෙ..මේ ගමට එක එක ජාතියේ ශ්‍රමණයො එනවා . ඒ ගොල්ලන්ගෙ එක එක වාද කියනවා. අනුන්ගෙ ඒවා ගරහනවා. කවුරු බොරු කියනවද කවුරු ඇත්ත කියනවද කියලා අපිට ලොකු සැකයක් එනවා

"හරි ඔබලට සැකයක් එන්න ඕනි තැනම සැකයක් ඇවිත් තියෙන්නෙ. ඊළඟ දවසෙ එහෙම එකක් ආපුවහම මෙන්න මේ නිර්ණායක වලින් බලන්න ඔබේ තර්කයට ගැලපෙනවා නම්.."

එහෙමයි බුදුන් දේශනා කළේ..

"මචන් මෙන්න මේ ක්‍රයිටීරියා වලට දමලා බලපල්ලා ඔය කරුණු ටික. මමත් ඔහොම අවුල් වෙච්ච වෙලාවල් වල කරන්න බලන්නෙ ඔහොමයි.." 

මම උණා නම් එහෙම කියයි.

මෙන්න දහය. 

මේක ගත්තෙ කාලාම සූත්‍රයෙන් ලිව්වෙ මට තේරෙන මගේ භාෂාවෙන්

1. අනුන් කියන හින්දා පිළි ගන්න එපා. යමක් තමට ඇසුණයි කියලා තමන්ගෙ සිහිබුද්ධියෙන් විමසලා බලන්ඩ ඕනි කියන එකයි මේ කියන්නෙ. ඕකෙන් කියවෙන්නෙ නෑ අනුන් කී හින්දා ප්‍රතික්ෂේප කරන්නයි කියලා . අනුන් කියන දේක ඇත්ත නැත්ත තෝරා බේරාගන්න අසන්නාට හැකියාව තියෙන්න ඕනි. එච්චරයි.

2. පරම්පරාවෙන් ආවයි කියලා පිලි ගන්නත් එපා. තමන්ගෙ පැරැන්නෝ ඇත්තයි කියලා එළඹිලා හිටි මතයන් ,අදහස් ඒ හින්දම පිළිගන්නත් එපා. මෙතෙන්ටත් සිහි බුද්ධිය යොදන්න.

3. යමක් මෙහෙම වෙන්න පුළුවන් කියලා අනුමාන කරලා හිතලා ඒක ඇත්ත හැටියටත් ගන්න එපා. මොකද අනුමාන කරන කරුණු සමහරවිට එහෙම වෙන්නත් පුළුවන් එහෙම නොවෙන්නත් පුළුවන්. අනුමාන කරපු කරුණු ඒ වෙලාවෙ ඇත්ත උණාට පස්සෙදි ඉඳුරාම වෙනස් වෙන්නත් පුළුවන්. බලන්නකෝ ඔය අනුමානෙට ප්‍රසිද්ධ බ්ලොග් ලියන අයගේ ජීවිත අල්ලලා පුදගලික පළි ගැනීම් වලට ලියන බ්ලොග් දිහා...ඔව්වා විශ්වාස කරගෙනම ඉන්න අය කොයිතරම් නම් ඉන්නවද ? ඒවා ලියන්නෙ අනුමාන මත...

4. ආගමික පොත් පත්වල තිබ්බයි කියලත් විමර්ශනයට ලක් නොකර නම් පිලි ගන්න එපා.. අපොයි අද පරිචය බලන්නකො ඔය ආගමික ග්‍රන්ථ ඔළුව උඩ තියාගෙන යන කොට්ඨාශයක් ඉන්නෙ...ආන්න ඒ අයට දීපු කම්මුල් පාරක මේක නම්...සයිබර් අවකාශයෙත් ඔහොමමයි ඉතින්..බ්ලොග් එකක තිබ්බයි කියලා පිලි ගන්ඩෙපා..විමර්ශනය කරන්න පුළුවන් තරම්.

5. තර්කානූකූල යැයි කියල පිලි ගන්නත් එපා. ඕනි පට්ට පල් බොරුවක් තර්කානුකූල කරලා රවුම් කරලා බටර් ගාලා ගිල්ලවන්න පුළුවන් අයියලා අද කාලෙ විතර වෙන කිසිම කාලෙක හිටියෙ නෑ..ඒ හින්දා තර්කානුකූලව ඉදිරිපත් කළා කියලා බොරුව ඇත්ත වෙන්නෙ නෑ...ඔව් ඔව් අර බ්ලොග් වල ලියලා තිබ්බ කතා උණත් මොන තර්කානුකූලව ලියලා තිබ්බත් ! ආයිමත් හිතලා බලන්නකො..

6. න්‍යායන් වලට අනුකූලයි කියලත් ඒක ඇත්තම තමයි කියලා පිළිගන්ඩෙපා කියලයි මේකෙන් කියවෙන්නෙ. මොකද න්‍යායක් හැදෙන්නෙ තරකානුකූලව..ඒ තර්කානුකූල ක්‍රමවේදය තුළින් එන්නෙ මහ බොරුවක් නම්...අනේ අදහන කෙනාට සොරි ඩොට්කොම් තමයි නේද ?

7.බොහොම දක්ෂ කථිකයෙකුට, බොහොම දක්ෂ ලේඛකයකුට පුළුවන් යමක් යහපත් දෙයක් කියලා තමන්ගේ තියෙන දක්ෂ කමින් ප්‍රයෝජන අරගෙන පෙන්නන්න. ඒත් ඒ පෙන්නන දේ සැබවින්ම යහපත්ද කියන එක කරුණු දිගින් දිගටම විග්‍රහ කරලා බලලාම පිළිගන්ඩයි කියලයි කියන්නෙ.

8. තමන් දැනටමත් බැඳිලා ඉන්න දැක්මකින් සහ ඒ දැක්මට ගැලපෙනවයි කියලා යමක් පිළිගන්නත් එපා..මොකද යමක ගැඹුර දකින්න ඒ දැක්ම බාදා වෙනවා වෙන්න පුළුවන්. පෙට්ටියෙන් පිට හිතන්න කියන්නෙ ඒකට වෙන්න ඕනියි කියලයි මට නම් හිතෙන්නෙ

9. දැන උගත් අයකු කියන දෙය ඒ උගත්කම නිසා ගරු කරලා පිලි ගන්න ඕනි කියලා පිලි ගන්ඩෙපා..දැන උගත් කම නිසා ඔහු /ඇයකෙරෙහි අපේ ඇති වෙන භක්තිය නිසාම ඔවුන් කියන දේ විමසීමකින් තොරවම ඒ විදියටම පිලි ගන්න ගියොත් අපේ ස්වාධීනතාවයට ඒක බාධාවක් වෙනවා

10. මෙයා අපේ ගුරුවරයා කියලා පිළිගන්නත් එපා..මෙතෙන්දි බෞද්ධයින්ට නම් කීවෙ බෞද්ධ ධර්මය වුණත් විචාරාත්මක විග්‍රහයක් කරලා මිසක් පිළිගන්ඩෙපා කියලයි..

ඔච්චරයි ඔය කරුණු දහයම තියෙන්නෙ කාලාම සූත්‍රයේ...

ඔය කරුණු දහයම එකට අනා ගෙන තමන්ටම කියලා ස්වාධීන චින්තනයක් ඇති කර ගත්තොත් අරයා අරක කිව්වා..මෙයා මේක කිව්වා..අර බ්ලොග් එකේ මට ගැහුවා..එම බ්ලොග් එකේ මට ගැහුවා...අයියෝ මම ඉවරයි කියලා හිත හිතා ඉන්න ඕනිත් නෑ...ඕකව අහු වෙච්ච දවසට අඬු හතරම කඩනවා කිය කියා යන්ඩ ඕනි වෙන්නෙ නෑ.. ...

ඔබේ ආගම මොකක් උණත්,  ඔබට තිබිය යුතු ස්වාධීන චින්තනය ගොඩනැගෙනවා නම් වෙන්න ඕනි එච්චරනෙ.

ඔබේ අරමුණ ජීවිතයේ සත්‍යය සොයා යාම හෝ එදිනෙදා ජීවිතයේ පැන නගින ගැටළුවලට විසඳුම් සොයනවා වෙනවා වෙන්න පුළුවන්...ඔය කොතෙන්දිත් මේ විග්‍රහයන් ප්‍රයෝජනවත් වෙනවා නේද කියලා ඔබලම විග්‍රහ කරලා බලන්නකෝ !

සියලු දෙනාටම වෙසඟේ අසිරිය සිතට දැනේවා..