බාගෙට කාපු වැල, 18+

"ඔය බලහන් ඔය ටොපික් එක දමපු ගමන්ම ටොපික් එක කියවන අය නොමඟ යනවා"


"ඒ ඇයි නොමඟ යන්නෙ ? ඉතින් මේකෙන් කියන්න හදන්නෙ ඒ වගේ කතාවක්නෙ.."


"උඹ බබා අනේ ෆල යන්ඩ ගහ ගනින් සූප්පුවක් කටේ"


"හරි ඉතින් උඹලා නොදන්න දෙයක් ගැන ඇහුවහම කියලා දෙන්නෙත් ඔහොම නම් ..ඔහොම යාළුවො 10ක් 15ක් කපා ගන්ඩ බැරියැ පොල්පිත්තකින්"


"කපා ගන්ඩ ඕනි එක මන් කියන්නෙ නෑ උඹට.. අඩෝ ඔය මඟුල් ටොපික් එක කියවපු ගමන්ම ඕනි කෙනෙකුට හිතෙන්නෙ මේ පෝස්ට් එක කුණුහරුප කතාවක්ය වගේම මේක බලන්න සුදුසු වයස 18 පැනපු අයට විතරයි කියලනෙ"


"ඈ එහෙමද ? මේක ඇත්තටම අපි 18 පැනපු කාලෙක වෙච්ච බාගෙයක් විතරක් කන්ඩ ලැබිච්ච වැලයක් ගැනනෙ කියන්නෙ.."


"උඹ ඕනි මඟුලක් ලියා ගනින්.. අපිට බෑ උඹ එක්ක තර්ක කරන්න..අර අපේ ලොකු අයිය කියන කතාව ඇත්ත තමයි"


"මොකද්ද ? මොකද්ද ? උඹලයෙ ලොකු අයියා මන් ගැන කියන නසරාණි කතාව ?"


"උඹ ගැන නෙවෙයි යකෝ..මන් ගැන, මොනා හරි කතා කරලා දිනන්න බැරි උනාම කියන්නෙ පණ්ඩිතයො දාහක් එක්ක කතා කරලා දිනන්න පුළුවන් ඒත් එක මෝඩයෙක් එක්ක කතා කරලා දිනන්න බෑයි කියලා..මන් යනවා යන්ඩ"


මන් කට ඇරගෙන බලන් ඉද්දිම මගේ අතීසාර මිත්‍රයා මාව තනි කරලා යන්ඩ ගියා..මොනවා කරන්නද ඉතින් හොඳට නරකට සේරටම ඉන්න යාළුවන්ගෙන් එකෙක් වෙච්චි..මොනා කීවත් මමත් ඉවසන් ඉන්නවා ඔන්න ඔහේ ඇඟෙ වදින එකක්යැ කියන වචන නම්..


ඉතින් ඔය වාදෙ ගියේ මන් මේ ලියන්න පෙරුම් පුරන අළුත් පෝස්ට් එකේ මාතෘකාව දැකලා තමයි..
-------------------------------------------------------------------------
මෙන්න එහෙනම් නිදාන කතාව...


අපි සා.පෙ කරලා ප්‍රථිපල එනකන් ගත කලේ මාර ජොලි කාලයක් තමයි..උදෙන්ම ගෙදරින් එලියට යනවා, ආයි එන්නෙ ආපහු රෑ ජාමෙ තමයි. අම්මලා තාත්තලා ඔහොම රස්තියෙ යන එක ගැන අවවාද දීලා දීලා ඇති වෙලයි තිබ්බෙ..ඒ නිසාම ඊට වඩා දෙයක් කීවෙම නෑ..


ඔය වගේ දවසක අපි හවස් ජාමෙ සෙල්ලම් කරලා ඉවරවෙලා හවස 5ට විතර ඇති..අපේ සෙට් එකටම බඩ ගිනී හොඳටම..ගෙවල් වල රෑට උයලා කන්නෙ රෑ 8ට අට හමාරට විතර නිසාත් ඒ වෙලාව වෙනකන් ඉවසන්න බැරි උන නිසාත් බඩ පුරව ගන්න ක්‍රමයක් කට්ටියම කතා වෙනවා දැන්..


ආපු දහසක් යෝජනා අතරින් හොඳම එක විදියට තෝරා ගත්තෙ රබර් වත්ත පාමුල කැලෑවෙ තිබ්බ වැල ගහේ වැල කමු කියන එකයි.. කඩෙන් හොරෙන් හුලන් විස්කෝතු කමු,..... ආරොං සිඤ්ඤො මාමගෙ පැලේ උයලා තියෙන ඒවා හොරෙන් කමු,..ගම පාමුල තිබ්බ සිරියා නැන්දලගෙ ගෙදර උයලා ඇති කියලා හිතෙන කෑම කමු,..... වගේ යෝජනා පස්සට කල් තැබුනා..


ඔය කියන කොස් ගහ අති විශේශ කොස් ගහක් තමයි. මොකද අවුරුද්ද පුරාම මේ කොස් ගහේ පොලොස්, මැල්ලුම් පොලොස්, කොස් සහ වැල වරදින්නේම නෑ. ඒ නිසාම ගමේ හැමෝම දන්නවා මේ කොස් ගහ. මේක තිබ්බෙ අක්කර ගනනාවක් වෙච්ච පාළු රබර් වත්තක මායිමේ තියෙන වත්තක. කොස් ගහ හොඳට අතු පතර විහිදිලා ගිය ගහක්. අහල පහල තියෙන නා නා ප්‍රකාර ගස් වලින් වැහිලා තියෙන නිසා මේ ගහ තියෙන හරිය දවාලකට උනත් හරිම පාළුයි. කළුවරයි..

"සුනිලො ගිහින් අරන් වරෙන් ලුනු ටිකක්"

අණ ලැබිච්ච සැනින් සුනිල් කලේ අතර මග තිබ්බ උන්ගෙ ගෙදර තිබුනු ලුනු පොල් කට්ටම උස්සන් ආපු එක..

"යකෝ ගෙදර අය රෑට මාලුවලට ලුනු දාන්නෙ කොහොමද?"

"ආයි පොල්කටු නෑ කියලද ගෙදර ? අළුත් එකක් හදා ගන්නැතැයි.."

සුනිල් එහෙම කීව නිසා ඊලඟ විනාඩියෙදි අපි සේරම කොස් ගහ උඩ.

අතු පතරෙ තිබ්බ ගෙඩි අතරින් හොඳම වැල ගෙඩිය අපිට හම්බ උනා..අපේ අජියගෙ හැම වෙලාවෙම ඉනේ තියන් ඉන්න පිහිය අරන් වැල ගෙඩිය ගහේ තියෙද්දිම හෙමිහිට කොස් කටුව කපලා අයින් කර ගත්තා..දැන් වැල මදුළු ටික හැන්දෑ ඉරු රැස් වැටිලා දිලිසෙනවා. කොස් අතු දෙබලෙක රඳවපු ලුනු පොල් කට්ට ..අපි එක එක වැල මදුල ගලවන් ලුනු පොල් කට්ටෙ ඔබා ගෙන කන්න පටන් ගත්තා.. වැල කන කොට කතා කරන්න එච්චර බැරි නිසා වෙන්න ඇති අපි බොහෝම නිහඬව, සාන්ත දාන්තව තමයි ඔය වැඩේ කලේ..

ඔය අතරෙ අජියා අපිට ඇඟිල්ලෙන් ඇන ඇන කොස් ගහ පාමුල පෙන්නුවා.. අප්පට සිරි සෝමෙ අක්කා පොඩි පහේ කෙක්කක් අරන් එනවා කොස් ගහ දිහාවට සුවර් එකටම ගැට පොලොස් කඩන්න තමයි. අපි කට්ටිය නිහඬ එකඟතාවයකට ආවෙ සෝමෙ අක්කා ගැට පොලොස් කඩා ගෙන ඉවර උනහම කොස් ඇට වලින් ගහලා හූ තියලා බය කරමු කියලයි.

මොකද සති කීපෙකින්ම ගමේ ගොඩේ තොවිලයක් කාරිය තිබ්බෙත් නෑ.. අපි දැනන් හිටියා හොල්මන් වලට බය වෙනවට වඩා මිනිස්සුන්ට බය උනහම ඒක අයින් කරවන්ඩ අමාරුයි කියලා..ඒ එක්කම හැමෝගෙම ඔළුවට ආවෙ ඊට මාස කීපෙකට ඉස්සර අරඹෙ තිබ්බ සොහොන් පොල ළඟදී බය වෙච්ච සොපි නැන්දා ගැන. ඔය බය වෙන්ඩ ඉස්සෙල්ලා සොපි නැන්දා කඩේ ගිහින් හැන්දෑවෙ හය හමාරට විතර ආපහු ගෙදර යන වෙලාව ඒ වෙලාවෙ සොපි නැන්දාගෙ ඇඟ ළඟින් හූ තියා ගෙන හෙලි කොට්ටෙන් දුවන් ගිය යක්කු දෙන්නා කවුද කියලා නැන්දට මතුරලා තොවිල් කරපු කට්ටඩි මාමාටත් වඩා අපි සෙට් එක දැනන් උන්නා..

අතු පතර විහිදිලා ගිය අත්තක හිටි නිසා සෝමෙ අක්කාට අපිව කොහොමත්ම පේන්නෙ නෑ. අපිත් දැන් කාපු වැල මදුළු වල කොස් ඇට 3-4 අතේ තියන් දත කට මැදන් ඉන්නවා හූ තියලා කෑ ගහන්න..අක්කා කඩා ගත්තා ගැට පොලොස් ගෙඩි දෙකක් මෙන්න තව එකකට කෙක්කෙන් අනිනවා..ඒ එක්කම අපේ ගෙවල් ළඟ හිටපු සුනිල් අයියා කොහෙන් ආවද මන්දා සෝමෙ අක්කව අල්ලා ගත්තා..සෝමෙ අක්කත් කෑ ගහන්නත් හදලා ආයිමත් සිරික්කිය දමලා මොන මොනවද කුටු කුටු ගෑවා..

කතා කරන්නෙ මොනාද කියලා අපිට ඇහුනෙ නැති තරම් ඈත උඩ කොස් අතු උඩ හිටි අපිට ඒ දෙන්නගෙන් අංග චලනයන් වලින් තේරුනා ගොනා හැරෙන්නෙ පොල් පැලේ කන්නද නැද්ද කියලා..අපිත් දැන් ගල් ගැහිලා ඉන්නවා..සුනිල් අයියා තව ගැට පොලොස් ගෙඩියක් කඩලා දුන්නා..දෙන්න එක්කම දැන් හොරෙන් හොරෙන් ආවෙ හරියටම අපි ඉන්න කොස් අත්ත යට හරියටමයි..මොකද ඒ හරිය ටිකක් එලි පහලි වෙලා තිබ්බෙ..අපිටත් උනේ අර මොකාටද උනා වගේ වැඩක්..සුනිල් අයියා අපිව දැක්කට ගානක් නැති උනාට සෝමා අක්කා දැක්කොත් එයාට හොඳ නෑ මොකද සෝමා අක්කගෙ නංගිගෙ පුතා අපි එක්ක එතකොටත් ගහ උඩ නිසා..


දැන් පහල ජෝඩුව පෙම් කෙලිය පටන් ගන්න ඔන්න මෙන්න..අපිත් නොසොල්මනෙ ඉන්නවා..අජියට ඕවා එච්චර ගානක් ඇති දේවල් නෙවෙයි වගේ මෙන්න මූ වැල කන්ඩ පටන් ගත්තා..අපි පහල බලනවා එකිනෙකාගෙ මූන බලනවා..මන් ළඟ හිටි නිමලයා වැල මදුලක් ගලවා ගත්තා පහල සීන් එක බල බලාම වැල මදුල එබුවා ලුනු පොල් කට්ටෙ..හුටාහ් අහක බලාගෙන එබුව මුගේ අත වැදිච්ච ලුනු පොල් කට්ට රඳවලා තිබ්බ දෙබලෙන් පැන්නා අහකට..පහල අතු පතර වල හැපි හැපි මේක වැටුනේ පහල හිටි ජෝඩුවෙ ඇඟටමයි.

හිර කරගෙන හිටි හිනාවත් එක්කම අපි සේරටම බිම බැලුනා.. මුලින්ම ඇඟට වැටිච්ච ලුනු වතුර ටිකත් එක්කම ගැස්සිලා දෙපැත්තට උනු දෙන්නා ඉඳ ගෙන හිටි පැත්තකට දොග් ගාලා වැටිච්ච ලුනු පොල් කට්ට අතට ගත්ත සුනිල් අයියා ටුක් ගාලා උඩ බැලුවා..අපේ සෙට් එකේම කකුල් දැක්කා විතරයි අපි දුටුවෙ සුරුශ් ගාලා දුවපු සුනිල් අයියාවයි. එතකොටත් සෝමා අක්කා සහ ගැට පොලොස් ගෙඩි තුන අපේ දෑස් මානයෙන් අතුරුදහන් වෙලයි තිබුනෙ..



කවුරු පටන් ගත්තද මන්දා හු කියලා පටන් ගත්ත හූවයි හිනාවයි ඉවර උනේ විනාඩි 2-3කින් ගහ යටින් ඇහිච්ච අමු තිත්ත කුනු හරුප වරුසාවෙන්මයි.පස්සෙ කීවෙ අපි හූ තිය තියා හිනා වෙන අස්සෙම ආයි ආපහු ආපු සුනිල් අයීයා දමලා දිව්ව සරමත් ඇඳ ගෙන ගහ මුලට ආව කියලා..


"බැහැපියව් සේරම ගහ මුලට"


අඩි එකහමාරක් විතර දිග හැන්දෑ අව්වට දිලිසෙන උල් පිහියක් වන වනා දැන් සුනිල් අයියා අපි දිහාවෙ බලන් ඉන්නවා..



"එක @##$%$# ක් හරි මේ කතාව ලීක් කරලා තිබ්බොත් පෙති ගහනවා කොස් ගෙඩියක් වගේ..තේරුනා නේද තොපිට?"


ඔව් කියන්නැහේ අපිත් එකා දෙන්නා එතනින් හෙමිහිට මාරු උනා. ඒ උනාට ඔය කතාව ගමේ ප්‍රචාර වෙන්න වැඩි කාලයක් ගියේ නෑ.. එක දවසක් අජියාව අල්ලා ගෙන ඕක අපේ සෙට් එක ලීක් කරා කියලා සුනිල් ගහන්න ගියා කියලා අජියා කීවා,


"උඹලා වෙන කොහේ හරි ඉන්නවා දැකපු වෙන එකෙක් ඕක ලීක් කරන්න ඇති"


අජියා එහෙම කියලා ශේප් වෙලා තිබ්බා..


අපිට ඒ දවස් වල තිබ්බ හෙනම අප්සට් එක තමයි අච්චර ශෝක් වැල ගෙඩියක් හම්බ වෙලාත් අපිට කන්න පුළුවන් උනේ ඒකෙන් බාගයයිනෙ කියලයි..

නිමි..